(Madda Oduu ABO/MOA/Caamsaa 18,2009) MOA Gambeellaa irraa akka gabaasanitti hojjettootni mootummaa naannicha keessatti argaman miindaa kafalamaafii waan hin jirreef mormii dhageessisuu irratti argamu.
Akka oduun nu ga’e hubachiisutti mootummaan wayyaanee miindaa hojjettoota naannoo Gambeellaa keessa jiranii kan baatii lamaa haga ammaa hin kafaliniif kan jiru yoo ta’u, sababaan isaa ammoo mootummaan baajeta dhabuu irraa ti kan jedhutu dhaga’ame.
Hojjettootni baatii lamaa oliif miindaan waan hin kennaminiif jiruuf rakkoon jireenyaa ulfaataan isaanii fi maatii isaanii mudachuu maddeen keenya beeksisaniiru.
Haala jeequmsi dinagdee fi qaalominni jireenyaa biyyattii dhaalee jiru keessatti miindaadhumti nuuf kennamtu iyyuu nu gahuu didee osoo nu rakkisaa jiruu, ittuu isheema argannu iyyuu nu dhorkachuun mootummichi dantaa ummata nan bulcha jedhuu kan hin qabne ta’uu agarsiisa jechuun hojjettootni naannoo Gambeellaa keessatti argaman aariidhaan dubbachaa jiran.
Mormii qaban dhageessisuuf jecha barsiisota dabalatee hojjettootni garii hojii dhaabuu kan eegalan oggaa ta’u, tarkaanfiin guutummaa Gambeellaatti babal’achuu akka hin oolles ni dubbatama.
Sirnichi wayta hojjettootaaf miindaan kafalun dhabe jedhee rakkina babal’isaa jiru kanatti meeshaa waraanaa maallaqa miliyoonotaan bite ammoo gara Gambeellaa gara daangaatti guuraa jiraachuu kan hubachiisan hojjettootni naannichaa, kun ammoo sirna isaa jiraachisuuf hojjechuu malee ummatoota biyyattii rakkataa jiraaniif dantaa dhabuu isaa mul’isa jedhan.
MOA |
